Uwakilishi wa wananchi unaporwa

Na Jenerali Ulimwengu

KATIKA kujadili michango ya watu na taasisi katika safari ya uboreshaji wa utawala na upanuzi wa demokrasia, wiki jana niligusia mchango wa Christopher Mtikila.

Nilieleza kwamba binafsi si shabiki mkubwa sana wa Mtikila, kwa sababu sikubaliani na baadhi ya matamko yake ambayo kwangu nayaona kama yanaudhi na wakati mwingine yanamharibia uwasilishaji wa hoja zake.

Lakini hatuwezi kutaraji kwamba mtu ye yote atakuwa na kila sifa njema na katika kila idara. Sote tunajijua kwamba tunazo kasoro zetu na hizo ndizo zinazotufanya tujue kwamba sisi sote tu wanadamu. Kwa hiyo, zile kasoro ninazoziona kwa Mtikila katika maeneo fulani ndizo zinazonifanya nikubali mchango wake mzuri katika  maeneo mengine, kama hili la upanuzi wa demokrasia.

Nimepata wasomaji wawili ambao hawakupenda Mtikila atajwe kama mtu mwenye mchango wo wote wa maana katika mchakato wa upanuzi wa demokrasia. Hawa wawili walikuwa na masuala waliyoyaibua, na ingekuwa vizuri iwapo wangeleta maoni yao kwa njia ya Barua kwa Mhariri au ingekuwa kupitia blog ambako watu wengi zaidi wangechangia.

Lakini mmoja wao amenisaidia kwa kunikumbusha umuhimu wa kuwa makini na watu ambao wanaweza kuwa chanzo cha vurugu na machafuko, hali inayoweza kutuumiza sote. Hakuna atakayepona iwapo machafuko kama hayo yatatokea, anasema.

Nakubaliana kabisa na msomaji huyo, na iwapo kuna msomaji mwingine mwenye mawazo kama hayo aliyoyatoa msomaji huyu, ningependa ajue kwamba nakubaliana naye moja kwa moja. Jambo ambalo siwezi kukubaliana nalo ni kusema kwamba wale wanaofanya kampeni ili kupanua demokrasia, pamoja na Mtikila, wanatishia amani au wanataka kusababisha machafuko ndani ya nchi.

Inawezekana yapo mambo ambayo yanaweza kuwa chanzo cha machafuko, na ni hayo mambo kwayo hatua za kisheria zinachukuliwa mara kwa mara dhidi ya Mtikila mwenyewe, na wala hapa mimi si mtetezi wake hata siku moja. Ama kwa hakika, nimekwisha kubainisha maoni yangu kuhusu masuala kama hayo.

Lakini nadhani kwamba ni kukataa kuona mantiki kama tutajiaminisha kwamba Mtikila (au mtu mwingine ye yote) anayetetea haki za msingi za raia, basi anataka kusababisha machafuko. Hiyo si kweli.

Ningependa kukariri kile nilichokisema mara kadhaa, nami sina sababu ya kukitilia shaka: machafuko ndani ya jamii hutokana ama na watawala wasioheshimu haki za watawaliwa, ama na uhasama baina ya makundi yanayotaka kutawala. Nafasi ya raia wa kawaida ni ile ya uhanga.

Ukweli ni kwamba Mtikila amesimama mbele na kujionyesha bila woga wowote wakati wengine wakisemea chini chini; amediriki kusema kwa sauti kuu wakati wengine wakinong’ona vijiweni. Lakini ni ukweli vile vile kwamba miongoni mwa wanademokrasia walio wengi, anachofanya Mtikila ni cha msingi, na kinastahili kupongezwa.

Katika mazingira mengine, na tungekuwa na jamii ya watu wanaodiriki kusema wanachokiamini, wala Mtikila asingepata nafasi ya kubeba mabango ya upanuzi wa demokrasia, kwa sababu kazi hiyo ingefanywa na watu ambao hiyo ndiyo kazi yao. Wangejitokeza wanasiasa ndani ya chama-tawala ambao wangewaambia wakuu wa chama chao kwamba ni upuuzi kuendelea kupinga dhana ambayo ni ya msingi kabisa katika haki za raia.

Wabunge wa chama-tawala wangewakumbusha viongozi wao jinsi walivyompoteza Dk. Wilbroad Slaa kwa kung’ang’ania dhana isiyo na maana yo yote isipokuwa kuwanyima raia haki yao. Wabunge wa Upinzani nao wangekuwa wakali zaidi kwa sababu ni jukumu lao pia kuikosoa Serikali pale inapoonyesha wazi kudharau haki za raia.

Endelea kusoma hapa…