Ripoti kamili ya udaku

Na Mwandishi Wetu

Nitaanza kwa kuhakikisha kichwa cha habari kina neno tata ili kumvutia msomaji, na hasa kumshtua!

Aya ya kwanza ya taarifa yangu ya ‘utafiti’ itaanza kwa kurudia kichwa cha habari pamoja na kuongeza chumvi kumfanya msomaji aendelee kufuatilia habari.  Nitajaribu juu chini kutumia maneno ya kiujumla kuelezea tuhuma/sakata/skendo hii ingawa sina nia ya kujadili kwa undani. Ikinibidi nitaweka hitimisho hapa hapa kwenye aya hii hii.

Kwenye aya itakayofuata nitajaribu kumuelezea zaidi mhusika tunayemjadili. Kama tumeshawahi kumuandika mhusika  katika magazeti yetu, nitaendeleza jadi ya kulitumia jina lake la umaarufu (mara nyingi majina haya ni sisi tuliyowapa). Kama taarifa inamuhusu kigogo fulani, nitataja sifa zake zote za kimaumbile au tabia,  ila nitahakikisha silitaji jina lake.

Nitahakikisha natumia maneno marahisi, na hasa ya mtaani pamoja na kuzifanya sentensi zangu ziwe fupi. Kila mara nitaangalia upenyo wa kutumia maneno yafuatayo ili kumvutia msomaji: tsunami, mlipuko, kasheshe, songombingo, mdebwedo na mshikemshike.

Katika aya hii nitajaribu kuongeza imani katika ripoti yangu kwa kutaja kuwa taarifa kuhusu tukio/tuhuma tunazoziripoti zimepokelewa kutoka kwa vyanzo vya uhakika. Au kwa kuweka bayana kuwa taarifa hizi zimetolewa ndani. Nitahakikisha ninataja kwenye mabano kuwa jina la aliyetutonya tunaliweka kapuni au tumelihifadhi. Kwa namna hii ninaendeleza ajenda yangu, ninataka msomaji ajue kuwa nikitaka kumuumbua mhusika ninaweza, ila basi tu, sitaki.

Kwenye aya itakayofuata nitaweka bayana kuwa jitihada zetu za kumtafuta kwa simu huyu celebrity tunayemchambua hazikufanikiwa. Kwa hili jitihada zetu huwa zinagonga ukuta mara kwa mara, in fact simu yake ilikuwa imezimwa. Kwa namna hii ninajaribu kuonyesha umma kuwa ninajali maelezo ya upande wa pili, ingawa ukweli ni kwamba hii sio motisha yangu. Pia wasomaji wangu watafurahi kufahamu kuwa namba ya simu ya celebrity huyu ninayo, na hivyo kunipa chati pamoja na kukipandisha chati gazeti letu.

Nitahakikisha kuwa kurasa nzima imejaa picha nyingi zaidi ya maneno ya ripoti yangu; si unajua wananchi wetu wanapenda kusoma vya chapchap? Hii sio Nyu yok Taimz bwana. Nitatafuta picha yoyote kutoka mtandaoni ya mtu maarufu au tukio lolote lile hata kama havihusiani! Nitaibandika picha yoyote bila kuifanyia formatting kwani nia hapa ni ‘ujumbe’ ufike tu.

Sitajitahidi kunukuu chanzo cha picha hii kwani ahh, sina muda. Kunukuu vyanzo Bongo? Nitajaribu kila niwezavyo kufuta maandishi yaliyowekwa na mmiliki; nikifanikiwa ninaweka nembo yangu ya hati miliki. Mambo ya Photoshop. Pamoja na hayo, nitahakikisha ninabandika picha nyingi zaidi za utata, ili mradi tu niendeleze ajenda yangu ya ‘kupaka.’

Kabla ya kumaliza nitahakikisha ninatunga nukuu kadhaa kuhusu yaliyosemwa na mhusika kuhusu habari hii, au nukuu za maoni ya watu mbali mbali mtaani.

Mara nyingi aya yangu ya mwisho sio hitimisho, na hivyo ripoti huwa ninaiacha ikining’inia…

Nadhani nimemaliza. Ngoja niitume.

Tayari.

Oh no, nimesahau kupitia spelling.